បាល់ទាត់ពិភពលោក ៖ ក្រូអាស៊ីមិនបានពាន តែបាននាំជ័យជំនះឱ្យប្រទេស
មានប្រជាជនតិចជាង៥លាននាក់ ជាប្រទេសដ៏តូចជាងគេមួយនៅអឺរ៉ុប ប៉ុន្តែថ្ងៃនេះ ក្រូអាស៊ី បានក្លាយជាប្រទេស -ជាជាតិសាសន៍បាល់ទាត់ដ៏ធំជាងគេបំផុតមួយ នៅលើពិភពលោក។ ដូចកីឡាករបារាំង ម្ចាស់ពានរង្វាន់បាល់ទាត់ពិភពលោកឆ្នាំ២០១៨ដែរ កីឡាករក្រូអាស៊ីបានធ្វើដំណើរត្រលប់ទៅកាត់មាតុប្រទេសនៅថ្ងៃចន្ទទី ១៦ កក្កដានេះ ក្រោមការស្វាគមន៍និងអបអរ ដូចវីរបុរស។ ទោះបីជាចាញ់បារាំង នៅក្នុងការប្រកួតវគ្គផ្តាច់ព័ត្រមែន តែក្រូអាស៊ី នៅតែមានមោទនភាពយ៉ាងខ្លាំង ចំពោះកីឡាករជាតិ របស់ពួកគេ។
ចុះផ្សាយនៅថ្ងៃ៖
ស្តាប់ - ០១:៤៦
អរគុណ ! ជាមោទនភាពជាតិ ! នេះជាពាក្យសង្ខេបយ៉ាងខ្លី មួយម៉ាត់មានលាន់ឮស្ទើរចេញពីគ្រប់ប្រអប់មាត់របស់បណ្តាប្រជាពលរដ្ឋក្រូអាស៊ី ដែលកំពុងបន្តរីករាយ អបអរសាទរ និងរង់ចាំទទួលស្វាគមន៍កីឡាករបាល់ទាត់ជាតិ ត្រលប់ចូលប្រទេសវិញ នៅថ្ងៃចន្ទនេះ។ សម្រាប់ ក្រូអាស៊ីទាំងមូល ក្រុមកីឡាបាល់ទាត់ជាតិ ជាជើងឯក ជាវីរបុរស ព្រោះពួកគេបានឡើងទៅដល់វគ្គផ្តាច់ព្រ័ត្រនៃការប្រកួតបាល់ទាត់ពិភពលោក ឆ្នាំ២០១៨។
ប្រជាពលរដ្ឋក្មេងចាស់ប្រុសស្រី ស្ទើរពេញមួយរដ្ឋធានី បន្តប្រមូលផ្តុំគ្នា ក្នុងសម្លៀកបំពាក់អាវយឺត ការ៉ូក្រហមស ឯកសណ្ឋានជាតិ នៅឡើយ ចាំទទួលក្រុមកីឡាករជាតិ ដែលលេងបានល្អជាង ក្រុមកីឡាករជាតិជំនាន់ឆ្នាំ១៩៩៨។
តូចតែខ្លឹម ! ប្រជាពលរដ្ឋចេះតស៊ូប្រយុទ្ធរហូតដល់ទីបំផុត ! ក្រូអាស៊ីពិតជាមានមោទនភាពនឹងមរកត ជាប្រជាជាតិកីឡាបាល់ទាត់ ដែលបន្យល់ទុកដោយអតីតយូហ្កោស្លាវីណាស់ ! នេះជាសារប្រកបដោយមោទនភាព របស់ក្រុមកីឡាបាល់ទាត់ក្រូអាស៊ី ព្រមទាំងអ្នកស្រលាញ់គាំទ្របាល់ទាត់ក្រូអាស៊ីទាំងអស់ ដែលបានបង្ហាញទៅកាន់ពិភពលោកទាំងមូល។
មិនបានទទួលពានមែន ប៉ុន្តែក្រុមកីឡាករជាតិបាននាំជោគជ័យមកឱ្យប្រទេសទាំងមូល។ អារម្មណ៍មួរហ្មង អាក់អន់ចិត្តព្រោះអន់ខ្សោយជាងសមាជិកសហភាពអឺរ៉ុបផ្សេងទៀត គ្មានសុទិដ្ឋនិយម ព្រោះសេដ្ឋកិច្ចគ្មានកំណើនតាំងពីជាច្រើនឆ្នាំ ត្រូវបានរលាយ។ ក្នុងរយៈពេលមួយខែ នៃការប្រកួតបាល់ទាត់ពិភពលោកនេះ ក្រូអាស៊ី បានប្រែមុខមាត់ថ្មី ជាប្រទេសរីករាយ ភ្លឺស្វាង មានសប្បុរស មិនមែនជាប្រទេសជ្រុលនិយម ចូលចិត្តបង្កហេតុដូចកាលពីឆ្នាំ២០១៦ ឬមានគេស្គាល់ព្រោះតែសង្គ្រាម លុងវិបត្តិ ដូចទសវត្សរ៍ឆ្នាំ១៩៩០ទៀតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ