អ៊ីរ៉ង់ប្រគល់ឯកសារស្តីពីសកម្មភាពនុយក្លេអ៊ែរ ជូនAIEA តាមការសន្យា
ដូចការគ្រោងទុក និងការសន្យារបស់អ៊ីរ៉ង់ រដ្ឋាភិបាលអ៊ីរ៉ង់ ទើបបានប្រគល់ជូន ទីភ្នាក់ងារថាមពលបរមាណូអន្តរជាតិ ហៅកាត់ថា AIEA នូវសំណុំ ឯកសារជាច្រើន ស្តីពីសកម្មភាពនុយក្លេអ៊ែរ របស់អ៊ីរ៉ង់កន្លងមក។ នេះជាការគោរព ទៅតាមកិច្ចព្រមព្រៀង ដែលអ៊ីរ៉ង់បានចុះជាមួយប្រទេសមហាអំណាចទាំង៦ ដើម្បីលាតត្រដាង ពីសកម្មភាពផលិតជាតិអ៊ុយរ៉ានីញ៉ូម របស់អ៊ីរ៉ង់ ដែលកន្លងមកត្រូវគេសង្ស័យថា យកទៅផលិតគ្រាប់បែកបរមាណូ។
ចុះផ្សាយនៅថ្ងៃ៖
ស្តាប់ - ០១:២៣
អ្នកនាំពាក្យ ទីភ្នាក់ងារថាមពលបរមាណូអន្តរជាតិ ហៅកាត់ថា AIEA ដែលមានតួនាទី ត្រួតពិនិត្យសកម្មភាពនុយក្លេអ៊ែរ របស់អ៊ីរ៉ង់ ទៅតាមកិច្ចព្រមព្រៀង បានបញ្ជាក់ថា ខ្លួនទើបបានទទួលសំណុំឯកសារស្តីពីសកម្មភាពនុយក្លេអ៊ែរកន្លងមករបស់អ៊ីរ៉ង់ ដែលភ្នាក់ងារនុយក្លេអ៊ែរអ៊ីរ៉ង់ ទើបប្រគល់ជូន នៅថ្ងៃអាទិត្យ ទី ១៦សីហានេះ។
អ្នកនាំពាក្យកិច្ចការនុយក្លេអ៊ែរអ៊ីរ៉ង់ បានអះអាងថា អ៊ីរ៉ង់បានធ្វើនូវអ្វី ដែលខ្លួនបានសន្យា ដោយគោរពទៅតាមកិច្ចព្រមព្រៀង ដែលបានចុះហត្ថលេខា កាលពីថ្ងៃទី ១៤ កក្កដា ជាមួយនឹងប្រទេសមហាអំណាចទំាង៦ មានបារាំង អាមេរិក អង់គ្លេស ចិន រុស្ស៊ី និងអាល្លឺម៉ង់។
ការប្រគល់ឯកសារស្តីពីសកម្មភាពផលិតជាតិអ៊ុយរ៉ានីញ៉ូម របស់អ៊ីរ៉ង់នេះ គឺជាជំហានទីមួយ នៃកម្មវិធីគ្រប់គ្រងនុយក្លេអ៊ែរអ៊ីរ៉ង់។ អ្វីដែលសហគមអន្តរជាតិចង់បានគឺ ភាពស្មោះត្រង់របស់អ៊ីរ៉ង់ ថាពិតជាមិនយក ធាតុអ៊ុយរ៉ានីញ៉ូមទាំងនោះ ទៅផលិតគ្រាប់បែកបរមាណូ។ ជាច្រើនឆ្នាំមកហើយ ដែលគេសង្ស័យថា រដ្ឋាភិបាលក្រុងតេអេរ៉ង់ បានលួចផលិតគ្រាប់បែកបរមាណូ ដោយសំងាត់។ ជាថ្នូរជាមួយនឹងការចូលទៅឆែកឆេរ និងត្រួតពិនិត្យរបស់ ភ្នាក់ងារបរមាណូអន្តរជាតិ អ៊ីរ៉ង់ នឹងត្រូវបានប្រទេសមហាអំណាច ដកទណ្ឌកម្មសេដ្ឋកិច្ចចេញ ដើម្បីឲ្យសេដ្ឋកិច្ចអ៊ីរ៉ង់ មានដង្ហើមដក ឡើងវិញ។
ទោះបីជាកិច្ចព្រមព្រៀងជាប្រវត្តិសាស្ត្រ ស្តីពីការគ្រប់គ្រង់នុយក្លេអ៊ែរអ៊ីរ៉ង់ ត្រូវបានគេអបអរក៏ដោយ ក៏ប្រទេសមួយចំនួន ដែលមាននិន្នាការស្អប់អ៊ីរ៉ង់ ដូចជាអារ៉ាប៊ីសាអ៊ូឌីត និង អ៊ីស្រាអែល ជាដើម នាំគ្នារិះគន់ថា ប្រទេសមហាអំណាចទាំង៦ កំពុងតែចាញ់បោកអ៊ីរ៉ង់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ