ជប៉ុនត្រៀមខ្លួនដាក់ទុនវិនិយោគនៅអ៊ីរ៉ង់
រដ្ឋាភិបាលជប៉ុន បានបញ្ជាក់ឲ្យដឹង នៅថ្ងៃសៅរ៍ ទី៥ កញ្ញា ថា ជប៉ុន នឹងចាប់ផ្តើម ជួបចរចា ជាមួយភាគី អ៊ីរ៉ង់ ចាប់ពីថ្ងៃចន្ទសប្តាហ៍ក្រោយទៅ ដើម្បីសម្រេចកិច្ចព្រមព្រៀង ស្តីពីកម្មវិធីវិនិយោគរបស់ជប៉ុន នៅក្នុងប្រទេសអារ៉ាប់ ដែលសំបូរប្រេងមួយនេះ។ នេះជាផលវិជ្ជមាន នៃកិច្ចព្រមព្រៀងស្តីពីកម្មវិធីនុយក្លេអ៊ែរអ៊ីរ៉ង់ ដែលបានធ្វើឲ្យប្រទេសមហាអំណាច ចាប់ផ្តើមដកទណ្ឌកម្មសេដ្ឋកិច្ចពីអ៊ីរ៉ង់ ហើយនិងធ្វើការវិនិយោគ ដើម្បីផ្តល់សន្ទុះថ្មី ដល់សេដ្ឋកិច្ចអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
លោក យូហ្ស៊ីហ៊ីតេ ស៊ុហ្គា នាយកខុទ្ទកាល័យនាយករដ្ឋមន្ត្រីជប៉ុន បានបញ្ជាក់ឲ្យដឹងថា ចាប់ពីថ្ងៃចន្ទ ទី៧ រហូតដល់ថ្ងៃពុធ ទី៩កញ្ញា គណប្រតិភូរដ្ឋាភិបាលជប៉ុន នឹងចរចាជាមួយអ៊ីរ៉ង់ ស្តីពីកម្មវិធី គម្រោងវិនិយោគ របស់ជប៉ុន ក្នុងប្រទេសនេះ។ លោកបានបន្តថា បន្ទាប់ពីកិច្ចព្រមព្រៀងស្តីពីនុយក្លេអ៊ែរ ត្រូវបានចុះហត្ថលេខា ប្រទេសមហាអំណាច នាំគ្នាត្រៀមខ្លួន ចូលទៅវិនិយោគនៅក្នុងប្រទេសអ៊ីរ៉ង់ ដែលសំបូរដោយធនធានធម្មជាតិ ជាពិសេស គឺធនធានប្រេងកាត។ ដូច្នេះ ជប៉ុនត្រូវតែប្រញ៉េបប្រញ៉ាប់ ដើម្បីចាប់កន្លែងអង្គុយ ឲ្យបានមុនគេ។
ជប៉ុនសង្ឃឹមថា ការបើកចំហរសេដ្ឋកិច្ចអ៊ីរ៉ង់ នាពេលនេះ នឹងអនុញ្ញាតឲ្យជប៉ុន បន្ថែមការនាំចូលទៅក្នុងអ៊ីរ៉ង់ ជាពិសេស គឺរថយន្តរបស់ជប៉ុន ហើយនឹងបន្ថែមការនាំចេញប្រេងកាត ពីអ៊ីរ៉ង់។ សេដ្ឋកិច្ចជប៉ុនរំពឹង ខ្លាំងទៅលើថាមពលប្រេង ដែលនាំចូលសឹងតែទាំងស្រុងពី តំបន់ដើមបូព៌ា។
សូមរំលឹកថា កន្លងមក ក្នុងពេលដែលអ៊ីរ៉ង់ មានវិបតិ្ត ជាមួយប្រទេសមហាអំណាច ជប៉ុនមិនបានបិទទ្វារទូត ទាំងស្រុងជាមួយអ៊ីរ៉ង់ទេ ពោលគឺជប៉ុន បានបន្តមានទំនាក់ទំនង ជាមួយអ៊ីរ៉ង់ ជាប់រហូតគ្រាន់តែការនាំចូល និងនាំចេញ មានកំរិតទៀបបំផុត។ មួយវិញទៀត ក្រោមការដាក់គំនៀបរបស់សហរដ្ឋអាមេរិក ជប៉ុនបានបញ្ឈប់ ការដាក់ទុនវិនិយោគថ្មីបន្ថែមនៅអ៊ីរ៉ង់ ចាប់តាំងពីឆ្នាំ១៩៩៣។ បច្ចុប្បន្ននេះ មានក្រុមហ៊ុនវិនិយោគជប៉ុន ចំនួនជាង៣០ ដែលកំពុងតែរកស៊ីនៅអ៊ីរ៉ង់។
ដូច្នេះ ឱកាសនេះ ពិតជាឱកាសមាស សម្រាប់ជប៉ុន ដើម្បីបន្ថែមការនាំទំនិញជប៉ុន ចូលអ៊ីរ៉ង់ ហើយនាំប្រេង ត្រឡប់មកជប៉ុនវិញ។ ក្រៅពីការពង្រីកវិស័យសេដ្ឋកិច្ច អ៊ីរ៉ង់ធ្លាប់បានសម្តែងចំណាប់អារម្មណ៍ ទៅលើវិស័យនុយក្លេអ៊ែរស៊ីវីល របស់ជប៉ុន ដោយអ៊ីរ៉ង់ ចង់បានបទពិសោធន៍ខ្លះ ពីជប៉ុន។ ដោយឡែក បើតាមផ្សាយរបស់ កាសែត Kyodo News រដ្ឋមន្ត្រីការបរទេសជប៉ុន ប្រហែលជាអាចទៅក្រុងតេអេរ៉ង់ នៅខែក្រោយ ដើម្បីពិភាក្សាពីកិច្ចការសេដ្ឋកិច្ចទ្វេភាគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ