ព្រះចៅ ហ្សកដានីប្រកាសឈប់ជួលដីឲ្យអ៊ីស្រាអែលតទៅទៀត
ព្រះចៅអាប់ដាឡាទី ២ នៃប្រទេសហ្សកដានី បានសម្រេចបិទបញ្ចប់ កិច្ចសន្យាជួលដី តទៅទៀត ទៅឲ្យប្រទេសអ៊ីស្រាអែល។ ទៅតាមកិច្ចព្រមព្រៀងសន្តិភាព អ៊ីស្រាអែល និងហ្សកដានី នៅឆ្នាំ ១៩៩៤ ហ្សកដានីយល់ព្រមជួលដី២កន្លែង ទៅឲ្យអ៊ីស្រាអែល សម្រាប់រយៈពេល ២៥ឆ្នាំ។ តាមសេចក្តីថ្លែងការណ៍របស់ព្រះរាជវាំង ហ្សកដានីបានជូនដំណឹងរួចហើយ ទៅភាគីអ៊ីស្រាអែល ពីការសម្រេចរបស់ព្រះចៅអាប់ដាឡា ទី ២។
ចុះផ្សាយនៅថ្ងៃ៖
នៅក្នុងកិច្ចប្រជុំជាមួយមន្រ្តីរាជវាំង ក្នុងរាជធានី អាម៉ង់ ព្រះចៅអាប់ដាឡាទី២ របស់ហ្សកដានី បានមានព្រះរាជឱង្ការថា ព្រះអង្គបានជូនដំណឹង ទៅអ៊ីស្រាអែលរួចហើយ ពីបំណងរបស់ព្រះអង្គដែលចង់បានមកវិញ ទឹកដីពីរកន្លែង ដែលហ្សកដានី បានជួលទៅ ឲ្យអ៊ីស្រាអែល ទៅតាមកិច្ចព្រមព្រៀងសន្តិភាព កាលពី២៥ឆ្នាំមុន។
បន្ទាប់ពីអេហ្ស៊ីប ហ្សកដានី ជាប្រទេសទី២របស់អារ៉ាប់ ដែលបានចុះកិច្ចព្រមព្រៀងសន្តិភាពជាមួយអ៊ីស្រាអែល។ ទៅតាមកិច្ចព្រមព្រៀងសន្តិភាព ចុះហត្ថលេខា នៅឆ្នាំ ១៩៩៤ ហ្សកដានី បានយល់ព្រមប្រគល់សិទ្ធិជួល ឲ្យអ៊ីស្រាអែល នូវទឹកដីពីរកន្លែង របស់ហ្សកដានី ដែលនៅជាប់ព្រំដែនជាមួយអ៊ីស្រាអែល និងដែលមានទំហំ ៦គីឡូម៉ែត្រការ៉េ និង៤គីឡូម៉ែត្រការ៉េ។ នៅក្នុងកិច្ចព្រមព្រៀង កិច្ចសន្យាជួល ខ្ចីដី ហ្សកដានី មានរយៈពេល២៥ ឆ្នាំ និងអាចពន្យារតទៅទៀត ដោយស្វ័យប្រវត្តិ បើសិនគ្មានការជំទាស់របស់ភាគី អ៊ីស្រាអែល ឬហ្សកដានី។
នៅថ្ងៃអាទិត្យ គឺនៅ៥ថ្ងៃមុន កាលកំណត់ដែលភាគីត្រូវជូនដំណឹងពីការពន្យារកិច្ចសន្យាជួលដី ព្រះចៅហ្សកដានី បានសម្រេចថា ហ្សកដានី បិទបញ្ចប់កិច្ចសន្យា មិនពន្យារពេលជួលដី ទៅឲ្យអ៊ីស្រាអែល ទៀតទេ។ ព្រះចៅអាប់ដាឡា ទី២ នៅបានមានព្រះឱង្ការថា ទឹកដីពីរកន្លែង របស់ហ្សកដានី Baqoura និងGhoumar គឺជាទឹកដី របស់ហ្សកដានី នាពេលបច្ចុប្បន្ន និងពេលអនាគត។ សម្រាប់ព្រះចៅហ្សកដានី ការសម្រេចយ៉ាងដូច្នេះរបស់ព្រះអង្គ គឺដើម្បីឆ្លើយតបនឹងការព្រួយបារម្ភរបស់ប្រជាជនហ្សកដានី នាពេលសព្វថ្ងៃនេះ។
នៅប៉ុន្មានថ្ងៃមកហើយ សន្ធិសញ្ញាសន្តិភាព ដែលមានភ្ជាប់ដោយកិច្ចសន្យាជួលដី ពីរកន្លែង ទៅឲ្យអ៊ីស្រាអែល បានបង្កឲ្យការជជែកពិភាក្សា នៅហ្សកដានី ជាទី ដែលសកម្មជន រួមទាំងសមាជិកសភាហ្សកដានីបានតវ៉ា ទាមទារឲ្យរដ្ឋាភិបាលបញ្ឈប់លែងជួលដីនៅតាមព្រំដែនទៅឲ្យអ៊ីស្រាអែល។ នៅថ្ងៃអាទិត្យ សមាជិកសភាហ្សកដានីបានថ្លែងស្វាគមអបអរការសម្រេចចិត្តរបស់ព្រះចៅអាប់ដាឡា ដែលបានផ្តល់កិត្តិយស ភាពថ្នៃថ្នូរ ដល់ប្រជាជនហ្សកដានី ហើយនិងទាមទារមកវិញ នូវអធិបតេយ្យភាព ឲ្យប្រទេសហ្សកដានី។
នៅខាងភាគីអ៊ីស្រាអែល គេនៅមិនទាន់ឃើញមានប្រតិកម្មជាផ្លូវការយ៉ាងណានៅឡើយទេ។ ប៉ុន្តែ នាយករដ្ឋមន្រ្តីអ៊ីស្រាអែល លោកបិនចាមីន នេតាយ៉ាហ៊ូ ធ្លាប់បានប្រាប់កាសែតក្នុងស្រុកអ៊ីស្រាអែលថា លោកនឹងចរចាជាមួយ ហ្សកដានី ដើម្បីពន្យារកិច្ចសន្យាជួលដី ហ្សកដានី តទៅមុខទៀត គឺនៅមុនពេលកិច្ចសន្យាចាស់ត្រូវចប់ នៅឆ្នាំក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ