តួកគី និងអាមេរិករួមគ្នា កម្ចាត់ខ្ចាយ ក្រុមជីហាត រដ្ឋអ៊ីស្លាមពីតំបន់ជាប់ព្រំដែនស៊ីរី តួកគី
អង្គការអូតង់បានបើកកិច្ចប្រជុំបន្ទាន់មួយ នៅថ្ងៃអង្គារ ទី ២៨ កក្កដា ទៅតាមការស្នើសុំរបស់តួកគី ប្រទេសសមាជិក ដើម្បីជជែកពីបញ្ហាសន្តិសុខ នៅតួកគី ក្រោយភេរវកម្ម សម្លាប់មនុស្ស ៣២នាក់ នៅប៉ែកខាងត្បូង តួកគី កាលពីសប្តាហ៍មុន។ កាលពីថ្ងៃចន្ទ សហររដ្ឋអាមេរិក និងតួកគីបានសម្រេច ពង្រឹងសហប្រតិបត្តិការយោធា ដើម្បីកម្ចាត់ក្រុមជីហាតរដ្ឋអ៊ីស្លាម ឲ្យអស់ពីតំបន់ភាគខាងជើងស៊ីរី ដែលនៅជាប់ជាមួយព្រំដែនតួកគី។
ចុះផ្សាយនៅថ្ងៃ៖
ស្តាប់ - ០២:២៣
អាមេរិក និងតួកគី ចាប់ដៃ សហការគ្នា ដើម្បីវាយបណ្តេញក្រុមជីហាតរដ្ឋអ៊ីស្លាមឲ្យអស់ពីទឹកដីភាគខាងជើងស៊ីរី។ តាមមន្រ្តីយោធាជាន់ខ្ពស់របស់អាមេរិក ដែលបាននិយាយប្រាប់ទីភ្នាក់ងារព័ត៌មានបារាំង AFP កាលពីថ្ងៃចន្ទ គោលដៅនៃសហប្រតិបត្តិការយោធាថ្មី របស់តួកគី និងអាមេរិក គឺបង្កើតតំបន់មួយ ដែលគ្មានក្រុមជីហាតរដ្ឋអ៊ីស្លាម នៅក្នុង ទឹកដីស៊ីរី ហើយនិងធានាស្ថិរភាព សន្តិសុខ នៅតាមតំបន់ព្រំដែន តួកគី ស៊ីរី។ ពាក្យធានាស្ថិរភាព សន្តិសុខតាមតំបន់ព្រំដែនតួកគី ស៊ីរី អាចឲ្យគេយល់ថា តួកគី មានសិទ្ធិផងដែរ វាយប្រហារទៅលើក្រុមឧទ្ទាម គួឌីស្ថាន PKK សត្រូវរបស់រដ្ឋាភិបាលក្រុងអង់ការ៉ា ដែលកំពុងបោះទីតាំងក្នុងទឹកដីស៊ីរី និងអ៊ីរ៉ាក់។
តាម អ្នកទទួលខុសត្រូវយោធា អាមេរិក ដដែល កិច្ចសហការយោធា អាមេរិក តួកគី មាននិយាយថា តួកគីនឹងជួយក្រុមប្រដាប់ប្រឆាំងស៊ីរី ដៃគូរបស់អាមេរិក ដែលកំពុងប្រយុទ្ធនៅក្នុងសមរភូមិ ប្រឆាំងនឹងក្រុមជីហាត អង្គការរដ្ឋអ៊ីស្លាម។ ប៉ុន្តែ ផ្ទុយទៅវិញ កិច្ចព្រមព្រៀង អាមេរិកតួកគី មិនបាននិយាយពីការបង្កើតតំបន់ហាមហោះហើរ ដូចដែលរដ្ឋាភិបាលតួកគីទាមទារចង់បាននោះទេ។
កាលពីថ្ងៃចន្ទ នាយករដ្ឋមន្រ្តីតួកគី លោក អាម៉េត ដាវូតូគ្លូបាននិយាយប្រាប់ទូរទស្សន៍តួកគី ថា សម្ព័ន្ធមិត្តអាមេរិក តួកគីបានយល់ស្របគ្នាថា នឹងបង្កើតតំបន់ហាមហោះហើរ មួយ ដើម្បី វាយកម្ចាត់ ក្រុមជីហាតរដ្ឋអ៊ីស្លាម និងជួយក្រុមប្រឆាំងស៊ីរី ឲ្យដណ្តើមយកទឹកដីស៊ីរី ភាគខាងជើងមកគ្រប់គ្រងវិញ។ “យើងមិនចង់ឃើញ ក្រុមជីហាតរដ្ឋអ៊ីស្លាមនៅព្រំដែនតួកគីទេ” នេះជាការនិយាយប្តេជ្ញាចិត្តរបស់នាយករដ្ឋមន្រ្តីតួកគី។
ក្រោយភេរវកម្ម សម្លាប់មនុស្ស៣២នាក់ នៅភាគខាងត្បូង ប្រទេស រដ្ឋាភិបាលតួកគីបានប្តូរជំហរ ១៨០ដឺក្រេ ដោយបានចូលរួមជាមួយ សម្ព័ន្ធអន្តរជាតិ វាយប្រហារទៅលើក្រុមជីហាតរដ្ឋអ៊ីស្លាម នៅក្នុងទឹកដីស៊ីរី ដែលជាអ្នកប្រកាសទទួលខុសត្រូវលើភេរវកម្មនៅតួកគី។ ប៉ុន្តែ ជាមួយគ្នានេះ រដ្ឋាភិបាលតួកគី ក៏បានឆ្លៀត បើកប្រតិបត្តិការវាយប្រហារផងដែរ ទៅលើក្រុមឧទ្ទាម គួឌីស្ថាន PKK ផងដែរ។ កាលពីថ្ងៃចន្ទ នាយករដ្ឋមន្រ្តីថែមទាំងបានសន្យាថា នឹងបន្តវាយប្រហារទៅលើក្រុមឧទ្ទាម គួឌីស្ថាន រហូតដល់ក្រុមនេះយល់ព្រមទម្លាក់អាវុធ។
តាមអ្នកវិភាគខ្លះ តួកគីបានសម្រេចចូលរួម ប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម ប៉ុន្តែ មិនបានប្តូរជំហរ របស់ខ្លួន ដែលចង់ឃើញ របបប្រធានាធិបតីស៊ីរី ដួលរលំនោះទេ។ តួកគីចង់កម្ចាយក្រុមជីហាត ដើម្បី យកតំបន់ស៊ីរី ជាប់ព្រំដែនតួកគី ឲ្យក្រុមប្រឆាំងស៊ីរី ដែលកំពុងប្រយុទ្ធប្រឆាំងនឹងទ័ពរដ្ឋាភិបាលស៊ីរី។ ម្យ៉ាងទៀត ដើម្បី បង្កើតតំបន់មួយក្នុងទឹកដីស៊ីរី សម្រាប់តែក្រុមប្រឆាំងស៊ីរី រដ្ឋាភិបាលក្រុងអង់ការ៉ា អាចនឹងមានលេស វាយប្រហារ បណ្តេញក្រុមឧទ្ទាមគួឌីស្ថាន PKK ឲ្យខ្ទាតចាកចេញឆ្ងាយពីព្រំដែនតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ