ចន ឃែរីថា ភាគីធំៗត្រូវសាមគ្គីគ្នា ក្នុងសំណុំរឿងកម្មវិធីនុយក្លេអ៊ែរអ៊ីរ៉ង់
ការចរចារវាងប្រទេសទាំង ៦ ជាមួយនឹងប្រទេសអ៊ីរ៉ង់ ស្តីពីកម្មវិធីនុយក្លេអ៊ែរអ៊ីរ៉ង់ កំពុងតែប្រព្រឹត្តិទៅ យ៉ាងតានតឹង នៅក្រុងឡូហ្សាន ប្រទេសស្វីស។ មានលេចឮឡើង ថា ភាគីទាំង៦ ដែលកំពុងតែចរចា ជាមួយអ៊ីរ៉ង់ កំពុងតែទាស់សំដីគ្នា ជាពិសេស ទាក់ទិនទៅនឹងគោលជំហររបស់អាមេរិក ដែលចង់ឲ្យសម្រេចការព្រមព្រៀងនេះ ឲ្យបានឆាប់រហ័ស។ លោក ចន ឃេរី ប្រមុខការទូតអាមេរិក បានចេញមកអះអាងថា ចំពោះមុខនឹងការចរចាលើសំណុំរឿងដ៏ស្មុកស្មាញនេះ ប្រទេសមហាអំណាចទាំង៦ ត្រូវតែសាមគ្គីគ្នា ឈរលើជំហរតែមួយ។
ចុះផ្សាយនៅថ្ងៃ៖
ស្តាប់ - ០២:២៦
ការចរចាស្តីពីកម្មវិធីនុយក្លេអ៊ែរ អ៊ីរ៉ង់ បានប្រព្រឹត្តិទៅ អស់រយៈពេល ១២ឆ្នាំមកហើយ។ បច្ចុប្បន្នភាគីដែលចូលរួមចរចា ជាមួយអ៊ីរ៉ង់ មានចំនួន ៦ប្រទេស គឺ សហរដ្ឋអាមេរិក បារាំង អាល្លឺម៉ង់ អង់គ្លេស ចិន និងរុស្ស៊ី។ កន្លងមក ភាគីទាំងអស់ បានកំណត់ឱសានុវាទ ជាដំណាក់ៗ ដើម្បីជំរុញឲ្យភាគីទាំងអស់ ប្រឹងប្រែងសម្រេចឲ្យបាន នូវ ការព្រមព្រៀង លើចំណុចសំខាន់ៗ ដែលត្រូវកំណត់ក្នុងកិច្ចព្រមព្រៀង ចុងក្រោយមួយ។
បច្ចុប្បន្ននេះ ភាគីទាំងអស់ កំពុងជួបប្រជុំគ្នា ក្នុងក្រុងឡូហ្សាន ប្រទេសស្វីស។ ភាគីទាំងអស់មានពេលរហូតដល់ ថ្ងៃ៣១ មិនា ដើម្បីស្រុះស្រួលគ្នា លើចំណុចសំខាន់ៗ។ ចំណែកឯកាលបរិចេ្ឆទចុងក្រោយ ដែលត្រូវសម្រេចឲ្យបាន នូវកិច្ចព្រមព្រៀងជាផ្លូវការ គឺនៅរវាងចុងខែ មិថុនា និងដើមខែកក្កដា ឆ្នាំ២០១៥នេះ។
ទាក់ទិននឹងកាលបរិច្ឆេទនេះឯង ដែលមានពាក្យលេចឮថា មានការមិនចុះសម្រុងគ្នារវាង ភាគីចរចា។ បើតាមការរាយការណ៍ បារាំងបានបង្ហាញគោលជំហរយ៉ាងច្បាស់ ថាបារាំងគាំទ្រឲ្យអ៊ីរ៉ង់ មានកម្មវិធីនុយក្លេអ៊ែរ ប៉ុន្តែអ៊ីរ៉ង់ ត្រូវតែធានាឲ្យបានថា ថាមពលនុយក្លេអ៊ែរនេះ មិនមែនប្រើដើម្បីផលិតគ្រាប់បែកបរមាណូទេ។ បារាំងក៏ដូចជាប្រទេសអ៊ឺរ៉ុបផ្សេងទៀត បានបន្ទោសដោយប្រយោល ទៅលើគោលជំហររបស់អាមេរិក ដែលចេះតែបន្ទាន់ឲ្យគ្រប់គ្នា សម្រេចកិច្ចព្រមព្រៀងនេះ ឲ្យឆាប់ៗ។
អ្នកនាំពាក្យអឺរ៉ុបម្នាក់ បាននិយាយថា ឱសានុវាទចុងក្រោយ គឺនៅខែ កក្កដា មិនមែនចុងខែមីនានេះទេ។ ដូច្នេះ គេមិនចាំបាញ់ បង្ខំឲ្យមានកិច្ចព្រមព្រៀងនយោបាយបណ្តោះអាសន្ន មុនដាច់ខែមីនាឡើយ។ ការធ្វើការដោយតក់ក្រហល់បែបនេះ អាចបង្កឲ្យមានផលវិបាក ទៅថ្ងៃក្រោយ ព្រោះថាសំណុំរឿងនុយក្លេអ៊ែរអ៊ីរ៉ង់ មានលក្ខណៈស្មុគស្មាញ ដែលតម្រូវឲ្យភាគីទាំងអស់ យកពេលពិភាក្សាគ្នា ឲ្យបានម៉ដ្ឋចត់។
ទោះបីជាយ៉ាងណា នៅថ្ងៃសៅរ៍ ទី២១ មិនានេះ លោក ចន ឃែរី ប្រមុខការទូតអាមេរិក បានចេញមកអះអាងថា អាមេរិក គ្មានចេតនា បង្ខំធ្វើកិច្ចព្រមព្រៀងនេះ ឲ្យតែបានឆាប់រហ័សនោះទេ។ លោកបញ្ជាក់ថា អាមេរិក ក៏ដូចភាគីទាំងអស់ ចង់បានកិច្ចព្រមព្រៀងមួយ ដែលផ្តល់ប្រយោជន៍រួមទាំងអស់គ្នា ហើយជាកិច្ចព្រមព្រៀង ដែលរឹងមាំ និងមានសន្តិសុខ។ ប៉ុន្តែលោក ចន ឃែរី បានបន្ថែមថា វាជាសំណុំរឿងដែលស្មុគស្មាញ ប៉ុន្តែវាល្មមដល់ពេលហើយ ដែលភាគីទាំងអស់ ត្រូវធ្វើការសម្រេចចិត្ត។ លោកបានឆ្លៀតបន្ថែមថា ស្ថិតក្នុងកាលៈទេសៈនេះ ភាគីទាំងអស់ គួរណាតែសាមគ្គីគ្នា ឈរលើជំហរតែមួយ មិនមែនរិះគន់បញ្ចើចបញ្ចើរគ្នា បែបនេះទេ។
សូមបញ្ជាក់ផងដែរថា លោក ចន ឃែរី នឹងធ្វើដំណើរទៅទីក្រុងឡុងដ៍ ជាទីដែលលោក នឹងជួបពិភាក្សាគ្នា ជាមួយប្រមុខការទូតអង់គ្លេស បារាំង និងអាល្លឺម៉ង់ ដើម្បីនិយាយគ្នាត្រង់ទៅត្រង់មក ទាក់ទិននឹងភាពមិនចុះសម្រុងគ្នានេះ។ រីឯការចរចាជាមួយអ៊ីរ៉ង់ នៅក្រុងឡូហ្សាន នឹងចាប់ផ្តើមបន្តទៀត នៅថ្ងៃទី ២៦ មីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ