អាវុធគីមីស៊ីរី៖ រុស្ស៊ីរារាំងក្រុមប្រឹក្សាសន្តិសុខ អាមេរិកគំរាមចាត់វិធានការឯកតោភាគី
ម៉ូស្គូចាត់ទុកថា "មិនអាចទទួលយកបានឡើយ" សេចក្តីព្រាងបច្ចុប្បន្ននៃសេចក្តីសម្រេច ដាក់ ចេញដោយ បារាំង អង់គ្លេស និងអាមេរិក នៅឯក្រុមប្រឹក្សាសន្តិសុខអ.ស.ប. ដែល ថ្កោលទោសការវាយប្រហារដោយអាវុធគីមី ពីសំណាក់កងអាកាសស៊ីរី ទៅលើក្រុងមួយក្នុងប្រទេសនេះ បណ្តាលឲ្យអ្នកស្រុកស្លាប់អស់ ៨៦នាក់ ពីក្នុងនោះ មានកុមារ៣០នាក់ និង ស្ត្រី២០នាក់ ហេតុដែល ស ឲ្យឃើញពីការបែកបាក់គ្នាជាថ្មី រវាងបស្ចិមលោក និងរុស្ស៊ី ជុំវិញសំណុំរឿងស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
ក្រសួងការបរទេសរុស្ស៊ី តាមរយៈអ្នកនាំពាក្យខ្លួន លោកស្រី Maria Zakharova បានថ្លែងក្នុង សន្និសីទកាសែតថា ចំណុចខ្វះខាតនៃសេចក្តីព្រាងសេចក្តីសម្រេចនោះ គឺមកពី មិនទាន់ធ្វើអង្កេតឲ្យបាន គ្រប់ជ្រុងជ្រោយផង ស្រាប់តែចង្អុលទៅហើយ ទៅលើអ្នកដែលថាត្រូវជាប់ពិរុទ្ធ។ មកពីមូលហេតុនេះ បាន ជា ម៉ូស្គូ មិនអាចទទួលយកបានជាដាច់ខាត សេចក្តីព្រាង ដាក់ចេញដោយ បី មហាអំណាច បស្ចិមលោក គឺ បារាំង អង់គ្លេស និងអាមេរិក ទាក់ទងនឹងស៊ីរីនោះ។
ចំណែកក្រសួងការពារជាតិរុស្ស៊ី បានអះអាងថា កងអាកាសស៊ីរី គឺដោយសំអាងលើ "ទិន្នន័យត្រឹមត្រូវ" ដែលបានវាយប្រហារ ទៅលើ "ឃ្លាំង" របស់ពួកឧទ្ទាម ជាទីដែលមានស្តុកទុក “ធាតុពុល” ច្នៃខ្លួនឯង ហើយពិតជា ការផ្ទុះ នៃឃ្លាំងនោះឯង ដែលធាតុគីមីនោះ បានធ្លាយមកបំពុលខ្យល់អាកាសក្រុងនោះ។
រីឯ អ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ ក្រោយពីមានការផ្ទុះឃ្លាំងអាវុធគីមីនោះ របស់ពួកឧទ្ទាម បានប្រកាសថ្ងៃពុធទី៥មេសាថា ប្រទេសរុស្ស៊ី និង កងកម្លាំងប្រដាប់អាវុធរុស្ស៊ី នឹងបន្តផ្តល់ ការគាំទ្រដល់ប្រតិបត្តិការប្រឆាំងភេរវនិយម ដែលសព្វថ្ងៃ ធ្វើដោយកងទ័ពស៊ីរី ដើម្បី រំដោះប្រទេសជាតិ។
រុស្ស៊ីផ្ទាល់ បានដាក់ចេញគម្រោងនៃសេចក្តីសម្រេចរបស់ខ្លួនដែរ។ ដូច្នេះ ថ្ងៃព្រហស្បតិ៍នេះ ក្រុមប្រឹក្សាសន្តិសុខ ត្រូវធ្វើការបោះឆ្នោត ជុំវិញ ឯកសារនេះរបស់រុស្ស៊ី ក៏ដូចជាជុំវិញ សេចក្តីព្រាងនៃសេចក្តីសម្រេច ដាក់ចេញ ដោយ បារាំង អង់គ្លេស និងអាមេរិក៕
ការវាយប្រហារដោយអាវុធគីមីនេះ វាបានធ្វើឲ្យខ្ញុំផ្លាស់ប្តូរទស្សនៈច្រើនចំពោះស៊ីរី និងលោកអាសាដ
ប្រសាសន៍របស់លោកដូណាល់ត្រាំ
នៅក្នុងពេលដែលដំណើរការបោះឆ្នោតនៅក្រុមប្រឹក្សាសន្តិសុខកំពុងជាប់គាំង ដោយសារតែមានការជំទាស់ពីរុស្ស៊ី សហរដ្ឋអាមេរិកបានគំរាមថានឹងចាត់វិធានការជាឯកតោភាគី ដើម្បីឆ្លើយតបទៅនឹងការវាយប្រហារដោយអាវុធគីមីទៅលើជនស៊ីវិលស៊ីរី។ នៅក្នុងអំឡុងសន្និសីទសារព័ត៌មាន ជាមួយព្រះមហាក្សត្រហ្សកដានី កាលពីម្សិលមិញ លោកដូណាល់ត្រាំ ដែលបានស្តីបន្ទោសលោកអូបាម៉ាថាមិនបានដោះស្រាយវិបត្តិស៊ីរី ក៏បានលើកឡើងផងដែរថា នៅពេលនេះលោកគឺជាប្រធានាធិបតី ហើយវាគឺជាការទទួលខុសត្រូវរបស់លោក ហើយថា ការវាយប្រហារដោយអាវុធគីមីទៅលើជនស៊ីវិលស៊ីរី កាលពីថ្ងៃអង្គារ វាបានធ្វើឲ្យលោកផ្លាស់ប្តូរទស្សនៈចំពោះលោកអាសាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ