អ៊ីស្រាអែលគ្រោងចរចាជាមួយក្រុមហាម៉ាស ខណៈបាតុករប៉ាឡេស្ទីនស្លាប់ម្នាក់ទៀត
កាលពីថ្ងៃសុក្រម្សិលមិញ បាតុកម្មហិង្សា នៅតែបន្តមាន នៅតាមបណ្តោយព្រំដែនតំបន់ហ្កាហ្សា និងអ៊ីស្រាអែល។ ទាហានអ៊ីស្រាអែល បានបាញ់គ្រាប់កាំភ្លើង បណ្តាលឲ្យស្លាប់យុវជនប៉ាឡេស្ទីនម្នាក់ និងមានអ្នករបួសជាង២០០នាក់ផ្សេងទៀត។ ដោយឡែក នៅព្រឹកថ្ងៃសៅរ៍នេះ ឆ្មាំសមុទ្រអ៊ីស្រាអែល បានស្ទាក់ចាប់បាននាវាមួយគ្រឿង ដឹកជនប៉ាឡេស្ទីន១២នាក់ ដែលមានបំណងឆ្លងចូលមកអ៊ីស្រាអែល។ វិបត្តិតំបន់ហ្កាហ្សា កំពុងរុញរដ្ឋាភិបាលអ៊ីស្រាអែល ឲ្យរងការរិះគន់យ៉ាងខ្លាំង ពីសំណាក់មតិអន្តរជាតិ។ បើតាមបណ្តាញព័ត៌មានអ៊ីស្រាអែល រដ្ឋាភិបាលអ៊ីស្រាអែល កំពុងព្យាយាមរិះរកកិច្ចព្រមព្រៀងមួយ ជាមួយក្រុមហាម៉ាសប៉ាឡេស្ទីន ដើម្បីបញ្ចប់ចលនាតវ៉ាហិង្សានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
បើគិតពីចុងខែមីនា មកត្រឹមពេលនេះ ចលនាបាតុកម្ម របស់ប្រជាជនប៉ាឡេស្ទីនតំបន់ហ្កាហ្សា ដែលប្រឆាំងតវ៉ា នឹងការហ៊ុំព័ទ្ធ បិទទ្វារសេដ្ឋកិច្ចពីសំណាក់អ៊ីស្រាអែលនោះ បានបណ្តាលឲ្យស្លាប់ជនស្លូតត្រង់ប៉ាឡេស្ទីន ប្រមាណ១៥៦នាក់ហើយ។ កាលពីថ្ងៃសុក្រ ទី៣សីហា យោងតាមទាហានអ៊ីស្រាអែល មានបាតុករប៉ាឡេស្ទីន ប្រមាណ៨ពាន់នាក់ ដែលបានធ្វើសកម្មភាពហិង្សានៅតាមព្រំដែន។ ទាហានអ៊ីស្រាអែល បានបាញ់គ្រាប់កាំផ្លើង បណ្តាលឲ្យស្លាប់ម្នាក់ និងរបួស២២០នាក់ ដែលក្នុងចំណោមនោះ មានប្រមាណ៩០នាក់ គឺរបួសដោយគ្រាប់កាំភ្លើង។
សូមបញ្ជាក់ថា បាតុករប៉ាឡេស្ទីនបានធ្វើការតវ៉ា ឲ្យអ៊ីស្រាអែលឈប់ហ៊ុំព័ទ្ធសេដ្ឋកិច្ច និងត្រូវបើកផ្លូវ ព្រមឲ្យជនប៉ាឡេស្ទីន អាចធ្វើដំណើរចេញចូលតំបន់ហ្កាហ្សា បានដោយសេរី។ ជាងនេះជនភៀសខ្លួនប៉ាឡេស្ទីន នៅតំបន់ហ្កាហ្សា បានទាមទារសិទ្ធិ វិលត្រលប់ទៅដីភូមិវិញ ដែលបច្ចុប្បន្នស្ថិតក្នុងដីអ៊ីស្រាអែល។
ដោយឡែក កាលពីព្រឹកថ្ងៃសោរ៍ទី ៤សីហានេះ នាវាមួយគ្រឿងដោតទង់ជាតិស៊ុយអ៊ែត ត្រូវបានឆ្មាំសមុទ្រអ៊ីស្រាអែលស្ទាក់បាន។ នាវា ដែលមានសរសេរឈ្មោះថា « សេរីភាពជូនតំបន់ហ្កាហ្សា » មានផ្ទុកជនប៉ាឡេស្ទីន១២នាក់។ នេះជានាវាទី២ហើយ ដែលអ៊ីស្រាអែលបានឃាត់បាន ក្នុងរវាងមិនដល់មួយសប្តាហ៍ផង ដោយនាវាទីមួយ មានដោតទង់ជាតិន័រវ៉េស ហើយផ្ទុកជនប៉ាឡេស្ទីន២២នាក់។
បញ្ហាតំបន់ហ្កាហ្សានេះ កំពុងធ្វើឲ្យរដ្ឋាភិបាលអ៊ីស្រាអែលរងការរិះគន់ពីគ្រប់ច្រកល្ហក។ អ្នកនាំពាក្យក្រុមហាម៉ាស បានប្រកាសកាលពីថ្ងៃព្រហស្បតិ៍ថា មេដឹកនាំហាម៉ាស បានមកជួបជុំគ្នានៅតំបន់ហ្កាហ្សា ហើយត្រៀមខ្លួនចរចាសន្តិភាព ជាមួយអ៊ីស្រាអែល។ យ៉ាងណាមិញ បើតាមការផ្សាយរបស់បណ្តាញព័ត៌មានអ៊ីស្រាអែល លោកនេតាន់យ៉ាហ៊ូ បានលប់ចោលដំណើរទៅក្រៅប្រទេស ដើម្បីប្រជុំរកដំណោះស្រាយតំបន់ហ្កាហ្សានេះ។ ប្រភពដដែលអះអាងថា អ៊ីស្រាអែល កំពុងចរចាជាមួយក្រុមហាម៉ាស ដើម្បីបិទបញ្ចប់ចលនាហិង្សា តាមរយៈការសន្យាយូរអង្វែងពីសំណាក់ក្រុមហាមា ថាត្រូវឈប់ពន្យុះឲ្យមានបាតុកម្ម ជាថ្នូរនឹងការដកដកចេញ នូវការហ៊ុំព័ទ្ធិសេដ្ឋកិច្ចខ្លះ ពីសំណាល់អ៊ីស្រាអែល។
សូមបញ្ជាក់ថា អស់រយៈពេលជាង១០ឆ្នាំមកហើយ ដែលតំបន់ហ្កាហ្សា ត្រូវបានអ៊ីស្រាអែល ចេញច្បាប់ព័ទ្ធបិទជិត ដោយចោទថាក្រុមហាម៉ាសប៉ាឡេស្ទីន ដែលគ្រប់គ្រងតំបន់នេះ គឺជាក្រុមភេរវកម្ម។ ប្រជាជនតំបន់ហ្កាហ្សា រស់នៅក្នុងភាពទីទ័លលំបាក ខ្វះទំនិញចំណីអាហារគ្រប់មុខ ហើយ ដោយចរន្តភ្លើងអគ្គីសនី ឬទឹកស្អាត គឺត្រូវរំពឹងលើការផ្គត់ផ្គង់ ពីសំណាក់អ៊ីស្រាអែលទាំងស្រុង។ យោងតាមអង្គការសហប្រជាជន ប្រជាជនប្រមាណ៨០% ក្នុងចំណោម២លាននាក់ នៅតំបន់ហ្កាហ្សា គឺរស់រំពឹងទាំងស្រុង ទៅនឹងជំនួយមនុស្សធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ