យេម៉ែន៖អង្គការគ្រូពេទ្យគ្មានព្រំដែនបង្ខំចិត្តជម្លៀសបុគ្គលិកដើម្បីសុវត្ថិភាព
នៅក្នុងប្រទេសយេម៉ែន អង្គការគ្រូពេទ្យគ្មានព្រំដែនបានសម្រេចចិត្តជម្លៀសបុគ្គលិករបស់ខ្លួនចេញពីមន្ទីរពេទ្យចំនួន ៦ស្ថិតប៉ែកខាងជើង។ សេចក្តីសម្រេចនេះត្រូវបានប្រកាសឲ្យដឹងនៅថ្ងៃព្រហស្បតិ៍ ទី១៨ សីហា និងដែលបានធ្វើឡើង បន្ទាប់ពីបានទទួលរងការវាយប្រហារផ្លូវអាកាសកាលពីដើមសប្តាហ៍នេះ។ អង្គការគ្រូពេទ្យគ្មានព្រំដែនបានបញ្ជាក់ថា ខ្លួនគ្មានជម្រើសអ្វីក្រៅពីសម្រេចចិត្តបែបនេះដើម្បីសន្តិសុខ និងសុវត្តិភាពដល់បុគ្គលិកទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
គឺតាមរយៈសេចក្តីជូនដំណឹងមួយដែលអង្គការគ្រូពេទ្យគ្មានព្រំដែនបានប្រាប់ឲ្យដឹងពីសេចក្តីសម្រេចចិត្តដកបុគ្គលិករបស់ខ្លួនចេញពីមន្ទីរពេទ្យចំនួន ៦ ស្ថិតប៉ែកខាងជើងប្រទេសយេម៉ែន។គឺជាការសម្រេចចិត្តមួយដែលប្រឆាំងនឹងឧត្តគតិ និងឆន្ទៈពិតរបស់អង្គការគ្រូពេទ្យគ្មានព្រំដែន តែយើងក៏ត្រូវការពារសន្តិសុខ និងសុវត្ថិភាពរបស់យើងដែរ នេះជាការបញ្ជាក់របស់លោកហាសាន ប៊ូសឺនីន នាយកអង្គការគ្រូពេទ្យគ្មានព្រំដែនប្រចាំប្រទេសយេម៉ែន។
លោកហាសាន ប៊ូសឺនីនបានបន្ថែមថា វាជារឿងមួយមិនអាចទទួលយកបានទេដែលច្បាប់ និងជីវិតជនស៊ីលមិនត្រូវបានគេគោរព។ តែយ៉ាងណាក៏ដោយ អង្គការគ្រូពេទ្យគ្មានព្រំដែនបានអះអាងថា ការជម្លៀសបុគ្គលិករបស់ខ្លួនចេញពីមន្ទីរពេទ្យទាំង ៦ នៅប៉ែកខាងជើងប្រទេសយេម៉ែនមិនមែនជាការបោះបង់ចោលការងារ ឬមួយជាការបិទទ្វារមន្ទីរពេទ្យទាំងនោះឡើយ។ តាមអង្គការមនុស្សធម៌មួយនេះដដែល មន្ទីរពេទ្យទាំង ៦ នៅបន្តដំណើរការជាធម្មតា ហើយបុគ្គលិកជាច្រើនទៀតរបស់អង្គការគ្រូពេទ្យគ្មានព្រំដែនកំពុងមានវត្តមាននៅកន្លែងផ្សេងក្នុងទឹកដីយេម៉ែន រួមទាំងនៅប៉ែកខាងជើងផង។
សូមជម្រាបជូនថា សេចក្តីសម្រេចចិត្តរបស់អង្គការគ្រូពេទ្យគ្មានព្រំដែនពេលនេះបានធ្វើឡើង បន្ទាប់ពីមន្ទីរពេទ្យបានទទួលរងការវាយប្រហារផ្លូវអាកាសពីកម្លាំងសម្ព័ន្ធមិត្តអារ៉ាប់ដឹកនាំដោយប្រទេសអារ៉ាប៊ីសាអូឌីតកាលពីថ្ងៃចន្ទ ទី១៥ សីហា។ យោងតាមអង្គការគ្រូពេទ្យគ្មានព្រំដែន តាំងពីប្រទេសយេម៉ែនធ្លាក់ក្នុងសង្គ្រាមស៊ីវិល ១ឆ្នាំកន្លះមក នេះជាលើកទី៤ ហើយដែលមន្ទីរពេទ្យមានបុគ្គលិកគ្រូពេទ្យគ្មានព្រំដែនបម្រើការងារនៅទីនោះបានទទួលរងការវាយប្រហារផ្លូវអាកាសពីសំណាក់កម្លាំងសម្ព័ន្ធមិត្តអារ៉ាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ