ចោរព័ត៌មានវិទ្យា វាយប្រហារគេហទំព័ររដ្ឋបាលរបស់តំបន់វ៉ាឡូនី ប៊ែលហ្ស៊ិក
ការវាយប្រហារតាមប្រព័ន្ធអ៊ីនធើនែត បានកើតជាថ្មីមួយករណីទៀត កាលពីយប់ថ្ងៃសុក្រ ទី ១០ មេសា ទៅលើគេហទំព័រ សេដ្ឋកិច្ចរបស់រដ្ឋបាលតំបន់វ៉ាឡូនី នៃប្រទេសប៊ែលហ្ស៊ិក។ ក្រុមចោរដែលជាអ្នកធ្វើប្រតិបត្តិការនេះ ត្រូវបានគេដឹងថាជាក្រុម អ៊ីស្លាមជ្រុលនិយម ដែលមានមូលដ្ឋាន នៅទុយណេហ្ស៊ី។ ក្នុងរយៈពេលចុងក្រោយនេះ ការវាយប្រហារតាមប្រព័ន្ធព័ត៌មានវិទ្យា បានក្លាយជាអាវុធថ្មី ដ៏កាចសាហាវ ដែលក្រុមជីហាតអ៊ីស្លាម បានប្រើប្រាស់ ដើម្បីបំភ័យប្រទេសមហាអំណាច ជាក់ស្តែងការ វាយប្រហារលើទូរទស្សន៍បារាំងអន្តរជាតិ ប៉ុស្តិ៍លេខ៥ កាលពីថ្ងៃពុធ។
ចុះផ្សាយនៅថ្ងៃ៖
ស្តាប់ - ០២:២៣
តំបន់វ៉ាឡូនី ភាគខាងត្បូង នៃប្រទេសប៊ែលហ្ស៊ិក ត្រូវបានរងការវាយប្រហារដោយក្រុមចោរព័ត៌មានវិទ្យា។ ក្រុមចោរ បានចូលទៅគ្រប់គ្រងគេហទំព័រអ៊ីនធឺនែត ស្តីអំពីព័ត៌មានសេដ្ឋកិច្ចរបស់តំបន់នេះ។ ក្រោយចូលទៅគ្រប់គ្រងគេហទំព័រហើយ ពួកចោរបានបង្ហោះផ្សាយវីដេអូមួយ ដោយមានរូបភាពបង្ហាញមនុស្សមួយចំនួន ដែលពួកវាអះអាងថា សុទ្ធសឹងជាជនរងគ្រោះ ដោយសារការទម្លាក់គ្រាប់បែក របស់អាមេរិក ក្នុងតំបន់ដើមបូព៌ា។ នៅខាងចុងក្រោយខ្សែវីដេអូនេះ មានសរសេរអក្សរថា “ងើបក្បាលចេញពីខ្សាច់ឡើង ក្រោកឈរឡើងប្រយុទ្ធនឹងអ្នកដឹកនាំប្រទេសរបស់អ្នក ហើយមកចូលរួមជាមួយក្រុមអ្នកតស៊ូ”។
តាមរយៈខ្សែវីដេអូ និងពាក្យសរសេរទាំងនេះ ធ្វើឲ្យគេដឹងយ៉ាងច្បាស់ ថាក្រុមចោរដែលធ្វើរឿងនេះ គឺជាក្រុមអ៊ីស្លាមជ្រុលនិយម។ កាសែត Le Soir របស់ប៊ែលហ្ស៊ិក បានចុះផ្សាយថា ក្រុមចោរព័ត៌មានវិទ្យា ដែលធ្វើរឿងនេះ គឺជាក្រុមអ៊ីស្លាមជ្រុមនិយមមួយក្រុម នៅប្រទេសទុយណេហ្ស៊ី ដែលមានឈ្មោះថា Fallaga Team។ កាសែតដដែលបានបញ្ជាក់ថា ក្រុមនេះ ធ្លាប់បានធ្វើប្រតិបត្តិការ វាយប្រហារតាមប្រព័ន្ធអ៊ីធើនែត ជារឿយៗ ទៅលើស្ថាប័នរដ្ឋ នៅប្រទេសបារាំង។
កាលពីខែមករាកន្លងទៅ ក្រុម Fallaga Teamបានលួចចូលទៅគ្រប់គ្រងគេហទំព័ររបស់ក្រុមប្រឹក្សាខេត្ត ឡូ នៅភាគខាងត្បូងបារាំង បានបីម៉ោង។ ដូចគ្នាដែរ គេហទំព័រអ៊ីនធើនែតរបស់ ការិយាល័យទេសចរណ៍របស់ខេត្ត ប៊ីយ៉ារីត្ស៍ វិមានសម្តេចប៉ាបប្រចាំក្រុង អាវីញ៉ុង និង វិហារកាតេដ្រាល ទីក្រុងណង់ត៍ ក៏ត្រូវបានក្រុម Fallaga Team ធ្វើការវាយប្រហារដែរ។ គេក៏សង្ស័យថា ការវាយប្រហារ ទៅលើទូរទស្សន៍បារាំង TV5Monde កាលពីថ្ងៃពុធកន្លងទៅ ក៏អាចជាស្នាដៃរបស់ពួកនេះផងដែរ។
យើងសង្កេតឃើញថា ក្នុងរយៈពេលចុងក្រោយនេះ ក្រុមអ៊ីស្លាមជ្រុលនិយម បានប្រើប្រាស់ប្រព័ន្ធព័ត៌មានវិទ្យា ដើម្បីជាអាវុធ ក្នុងការធ្វើប្រតិបត្តិការ បង្កការខូចខាត និងការភ័យខ្លាច នៅតាមប្រទេសធំៗ ដែលបានចូលរួមបេសកកម្ម កម្ទេចពួកជីហាត នៅតំបន់ដើមបូព៌ា ជាមួយនឹងអាមេរិក។ នេះជាមធ្យោបាយមួយ ដែលពួកវាធ្វើការសងសឹកតបមកវិញ។
បញ្ហានេះ ត្រូវបានគេព្រួយបារម្ភជា ខ្លាំងពីសុវត្ថិភាពទូទៅ ដោយសារ តែបច្ចុប្បន្ននេះ អ្វីៗក៏ត្រូវការប្រើប្រាស់អ៊ីនធើនែត និងប្រព័ន្ធព័ត៌មានវិទ្យាដែរ។ ដូច្នេះ បើសិនជាប្រព័ន្ធបច្ចេកវិទ្យានេះ មានការអាក់ខាន រឺក៏ខូចខាតលែងដំណើរការ ចលាចលប្រាកដជាអាចមាន ហើយគ្រោះថ្នាក់ប្រាកដជាមានដែរ។ ជាឧទាហរណ៍ ប្រព័ន្ធបញ្ជាការហោះហើររបស់យន្តហោះ រឺបញ្ជាការបើកបររថភ្លើងល្បឿនលឿន។ បើសិនជាប្រព័ន្ធទាំងនេះជួបបញ្ហា រឺក្រុមចោរចូលទៅគ្រប់គ្រងបាន មានន័យថា យន្តហោះអាចនឹងហោះបុកទង្គិចគ្នា រថភ្លើងបើកបុកគ្នា ជាក់ជាពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ