បារាំងប្រកាសត្រៀមខ្លួនផ្តល់សិទ្ធិជ្រកកោនដល់គ្រិស្តសាសនិកដែលរត់ភៀសខ្លួនពីអ៊ីរ៉ាក់
បារាំងបានប្រកាស នៅថ្ងៃចន្ទនេះថា ខ្លួនត្រៀមខ្លួនសម្រួលដល់ដំណើរការផ្តល់សិទ្ធិជ្រកកោនដល់អ្នកកាន់សាសនាគ្រិស្ត ដែលរត់ភៀសខ្លួនចេញពីប្រទេសអ៊ីរ៉ាក់។ គ្រិស្តសាសនិកអ៊ីរ៉ាក់ ដែលកំពុងទទួលរងការធ្វើទុក្ខបុកម្នេញ ពីសំណាក់ក្រុមជីហាត ក្រោយពីពួកគេបានវាយលុកចូលកាន់កាប់ទឹកដីមួយផ្នែកធំ នៅប៉ែកខាងជើងប្រទេសអ៊ីរ៉ាក់ កាលពីខែមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
នៅក្នុងសេចក្តីប្រកាសព័ត៌មានរួម នៅថ្ងៃចន្ទ រដ្ឋមន្រ្តីក្រសួងការបរទេស និងក្រសួងមហាផ្ទៃបារាំងបានប្រកាសថា បារាំងត្រៀមខ្លួនផ្តល់សិទ្ធិជ្រកកោនដល់គ្រិស្តសាសនិកអ៊ីរ៉ាក់ណា ដែលមានបំណងចង់ភៀសខ្លួនមករស់នៅក្នុងប្រទេសបារាំង។ សេចក្តីប្រកាសព័ត៌មានរួមនេះត្រូវបានធ្វើឡើង ក្រោយពីមានបាតុកម្មជាបន្តបន្ទាប់ នៅទូទាំងប្រទេសបារាំង ទាមទារឲ្យរដ្ឋាភិបាលបើកភ្នែកមើលឃើញដល់ទុក្ខវេទនារបស់គ្រិស្តសាសនិកអ៊ីរ៉ាក់។
គួរបញ្ជាក់ថា នៅក្រោយពេលវាយលុកចូលកាន់កាប់តំបន់ប៉ែកខាងជើងប្រទេសអ៊ីរ៉ាក់ កាលពីខែមុន ក្រុមជីហាតអ៊ីរ៉ាក់បានដាក់ជម្រើស ២ ដល់គ្រិស្តសាសនិកអ៊ីរ៉ាក់៖ ឬមួយពួកគេត្រូវចូលសាសនាអ៊ីស្លាម ឬមួយត្រូវចាកចេញពីតំបន់ដែលស្ថិតក្រោមការគ្រប់គ្រងរបស់ពួកជីហាត បើមិនដូច្នោះទេ ពួកគេនឹងត្រូវប្រឈមមុខនឹងសេចក្តីស្លាប់។ គ្រិស្តសាសនិកអ៊ីរ៉ាក់រាប់ពាន់នាក់ក៏បានជ្រើសរើសការភៀសខ្លួន ដោយមួយចំនួនធំ បាននាំគ្នារត់ទៅជ្រកកោននៅក្នុងតំបន់ស្វយ័ត Kurdistan។
នៅក្នុងពេលបច្ចុប្បន្ននេះ គេមិនមានតួលេខពិតប្រាកដបញ្ជាក់ អំពីចំនួនគ្រិស្តសាសនិក ដែលកំពុងរស់នៅក្នុងប្រទេសអ៊ីរ៉ាក់នោះទេ។ តួលេខចុងក្រោយដែលគេមាន គឺកាលពីមុនពេលអាមេរិកចូលឈ្លានពានអ៊ីរ៉ាក់ នៅឆ្នាំ២០០៣ ដែលនៅពេលនោះ ចំនួនប្រជាជនអ៊ីរ៉ាក់ កាន់គ្រិស្តសាសនាមានប្រមាណជាង ១លាននាក់។
កាលពីសប្តាហ៍មុន ក្រុមប្រឹក្សាសន្តិសុខអ.ស.បក៏ធ្លាប់បានថ្កោលទោសការធ្វើទុក្ខបុកម្នេញដល់គ្រិស្តសាសនិក និងក្រុមជនជាតិភាគតិចផ្សេងទៀត ដោយក្រុមជីហាតអ៊ីរ៉ាក់នេះដែរ។ នៅក្នុងសេចក្តីថ្លែងការណ៍អនុម័តជាឯកច្ឆន្ទដោយប្រទេសជាសមាជិកទាំង ១៥ ក្រុមប្រឹក្សាសន្តិសុខបានធ្វើការរំឭកដល់ក្រុមជីហាតអ៊ីរ៉ាក់ថា “រាល់ការធ្វើទុក្ខបុកម្នេញជាលក្ខណៈទូលំទូលាយ ឬជាប្រព័ន្ធចំពោះជនស៊ីវិល ដោយមកពីហេតុផលជាតិសាសន៍ ឬសាសនាអាចនឹងត្រូវចាត់បញ្ចូលជាឧក្រិដ្ឋកម្មប្រឆាំងមនុស្សជាតិ ដែលអ្នកប្រព្រឹត្តនឹងត្រូវទទួលខុសត្រូវចំពោះមុខច្បាប់”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ