អ៊ីរ៉ង់នឹងទិញយន្តហោះអ៊ែរប៊ូស១១៤គ្រឿងពេលទៅបំពេញទស្សនកិច្ចនៅបារាំង
មួយសប្តាហ៍ក្រោយពីការដកទណ្ឌកម្មអន្តរជាតិ អ៊ីរ៉ង់បានប្រកាសឲ្យដឹងជាបន្តបន្ទាប់នូវកិច្ចព្រមព្រៀងពាណិជ្ជកម្មក្រៅប្រទេស ក្នុងទំហំទឹកប្រាក់យ៉ាងច្រើនសន្ធឹកសន្ធាប់។ កាលពីថ្ងៃសៅរ៍ គឺកិច្ចព្រមព្រៀងសហប្រតិបត្តិការពាណិជ្ជកម្មជាមួយចិន ចំណែកឯថ្ងៃអាទិត្យនេះ គឺការប្រកាសឲ្យដឹងអំពីគម្រោងទិញយន្តហោះអ៊ែរប៊ូស រហូតដល់ទៅ ១១៤គ្រឿង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
កិច្ចសន្យាទិញយន្តហោះដឹកអ្នកដំណើរធុនអ៊ែរប៊ូស ទាំង ១១៤គ្រឿង នឹងត្រូវចុះហត្ថលេខា នៅក្នុងអំឡុងដំណើរទស្សនកិច្ចរបស់លោកប្រធានាធិបតី ហាសាន់ រ៉ូហានី នៅក្នុងប្រទេសបារាំង នៅថ្ងៃទី២៧មករាខាងមុខនេះ។ នេះបើយោងតាមការប្រកាសរបស់រដ្ឋមន្រ្តីក្រសួងដឹកជញ្ជូនរបស់អ៊ីរ៉ង់។ ទោះជាយ៉ាងណា អ៊ីរ៉ង់មិនបានបញ្ជាក់លម្អិតទេ អំពីម៉ូដែលនៃយន្តហោះដែលត្រូវទិញ ហើយក៏មិនប្រាប់ឲ្យដឹងដែរ អំពីតម្លៃសរុបនៃកិច្ចសន្យានេះ។
គួរបញ្ជាក់ថា លោកប្រធានាធិបតីអ៊ីរ៉ង់នឹងចាប់ផ្តើមដំណើរទស្សនកិច្ចជាលើកដំបូងបង្អស់ ទៅកាន់តំបន់អឺរ៉ុប នៅសប្តាហ៍ក្រោយ ដោយចាប់ផ្តើមពីប្រទេសអ៊ីតាលី នៅថ្ងៃចន្ទ មុននឹងទៅប្រទេសបារាំង នៅថ្ងៃពុធ។ តាមការពិត ដំណើរទស្សនកិច្ចនៅបារាំងនេះត្រូវគ្រោងធ្វើ តាំងពីខែវិច្ឆិកាម៉្លេះ ក៏ប៉ុន្តែ ត្រូវលើកពេលទៅវិញ នៅក្រោយពីមានភេរវកម្មនៅប៉ារីស កាលពីថ្ងៃទី១៣វិច្ឆិកា។
ដំណើរទស្សនកិច្ចរបស់លោកហាសាន់ រ៉ូហានី គឺជានិមិត្តរូបថ្មីមួយទៀត នៃការបិទបញ្ចប់ភាពឯកោផ្នែកការទូតរបស់អ៊ីរ៉ង់ ហើយសម្រាប់បណ្តាប្រទេសនៅអឺរ៉ុប ការដកទណ្ឌកម្មអន្តរជាតិកំពុងតែធ្វើឲ្យអ៊ីរ៉ង់ក្លាយជាទីផ្សារប្រកបដោយសក្តានុពល សម្រាប់ការនាំចេញ ក្នុងនោះ វិស័យអាកាសចរណ៍ស៊ីវិល គឺជាវិស័យដ៏ចម្បងមួយ។
យោងតាមរដ្ឋមន្រ្តីក្រសួងដឹកជញ្ជូនអ៊ីរ៉ង់ នៅក្នុងពេលបច្ចុប្បន្ននេះ អ៊ីរ៉ង់មានយន្តហោះដឹកអ្នកដំណើរតែ ១៥០គ្រឿងប៉ុណ្ណោះដែលនៅមានដំណើរការ ប៉ុន្តែសុទ្ធតែជាយន្តហោះចាស់ៗអស់ទៅហើយ។ ចំណែកឯតម្រូវការពិតប្រាកដនៃវិស័យដឹកជញ្ជូនរបស់អ៊ីរ៉ង់ គឺត្រូវការយន្តហោះរហូតដល់ទៅ ៤០០គ្រឿងឯណោះ។
ដូច្នេះ កិច្ចសន្យាទិញយន្តហោះអ៊ែរប៊ូសចំនួន ១១៤គ្រឿង ដែលអ៊ីរ៉ង់គ្រោងចុះនៅសប្តាហ៍ក្រោយនេះ គ្រាន់តែជាជំហានដំបូងតែប៉ុណ្ណោះ។
រដ្ឋាភិបាលអ៊ីរ៉ង់បានបង្ហើបឲ្យដឹងថា ខ្លួនក៏មានបំណងចង់ចរចាទិញយន្តហោះប៊ូអ៊ីងពីសហរដ្ឋអាមេរិកផងដែរ ក៏ប៉ុន្តែ រហូតមកទល់នឹងពេលនេះមិនទាន់មានការចរចាណាមួយអាចចាប់ផ្តើមធ្វើបាននៅឡើយទេ ដោយសារតែរដ្ឋាភិបាលអាមេរិកមិនទាន់បើកភ្លើងខៀវឲ្យក្រុមហ៊ុនប៊ូអ៊ីងចរចាជាមួយក្រុមហ៊ុនអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ