បោះឆ្នោតអ៊ីស្រាអែល៖គូប្រជែង ២នាក់របស់លោកនេតាន់យ៉ាហ៊ូបានចងសម្ព័ន្ធភាពជាមួយគ្នា
នៅក្នុងប្រទេសអ៊ីស្រាអែល ការបោះឆ្នោតសភាមុនអាណត្តិគ្រោងរៀបចំនៅថ្ងៃទី៩ មេសា។ លោកនេតាន់យ៉ាហ៊ូដែលកំពុងជាប់ជំពាក់វាក់វិននឹងរឿងអាស្រូវពុករលួយ និងកំពុងកាន់តំណែងនាយករដ្ឋមន្រ្តីបានប្រកាសឈរឈ្មោះសម្រាប់ការបោះឆ្នោតមុនអាណត្តិនេះ។ តែលោកត្រូវប្រកួតប្រជែងទល់នឹងបេក្ខជនមកពីគណបក្សផ្សេងទៀត ពិសេសសម្ព័ន្ធភាពរវាងគណបក្សទើបបង្កើតថ្មីដោយលោកបេននី ហ្គង់ និងគណបក្សកណ្តាលនិយមរបស់លោកយែរ ឡាពីដ។ យ៉ាងណាក៏ដោយ លទ្ធផលស្ទង់មតិចុងក្រោយនៅតែផ្តល់ជោគជ័យឲ្យគណបក្ស Likoud របស់លោកនេតាន់យ៉ាហ៊ូ។
ចុះផ្សាយនៅថ្ងៃ៖
ស្តាប់ - ០២:២១
ទោះបីជាលោកនេតាន់យ៉ាហ៊ូ និងគណបក្ស Likoud របស់លោកមានសំណាងច្រើននឹងឈ្នះឆ្នោតនៅក្នុងការបោះឆ្នោតសភាមុនអាណត្តិនាថ្ងៃទី៩ មេសាខាងមុខក៏ដោយ ក៏ការចងសម្ព័នភាពរវាងគណបក្សរបស់លោកបេននី ហ្គង់ និងគណបក្សរបស់លោកយែរ ឡាពីដកំពុងធ្វើលោកនេតាន់យ៉ាហ៊ូបារម្ភតិចទេ។ បារម្ភព្រោះលោកបេននី ហ្គង់ជាអតីតមេបញ្ជាការកងទ័ព ហើយលោកយែរ ឡាពីដធ្លាប់ធ្វើរដ្ឋមន្រ្តីកសួងហិរញ្ញវត្ថុក្នុងរដ្ឋាភិបាលទី៣ របស់លោកនេតាន់យ៉ាហ៊ូ។ ដូច្នេះសម្ព័ន្ធភាពរវាងលោកបេននី ហ្គង់ និងលោកយែរ ឡាពីដ គឺជាការចែករំលែកបទពិសោធន៍យោធា និងបទពិសោធន៍នយោបាយរវាងគ្នា។
តាមពិតទៅ តាំងពីថ្ងៃផ្តើមយុទ្ធនាការឃោសនាបោះឆ្នោតដំបូងមកម្ល៉េះដែលលោកបេននី ហ្គង់ និងលោកយែរ ឡាពីដបានអំពាវនាវឲ្យធ្វើបញ្ជីបោះឆ្នោតរួមគ្នាតែមួយ តែម្នាក់ៗបានរង់ចាំការបោះដៃពីម្នាក់ទៀតជាមុនសិន។ គឺទើបនៅយប់ជ្រៅក្នុងថ្ងៃពុធ ទី២០ ឆ្លងចូលថ្ងៃព្រហស្បតិ៍ ទី២១ កុម្ភៈដែលភាគីទាំងពីរបានចុះហត្ថលេខាលើកិច្ចព្រមព្រៀងចងសម្ព័ន្ធភាពជាមួយគ្នាជាផ្លូវការ។ តាមកិច្ចព្រមព្រៀង និងក្នុងករណីដែលឈ្នះឆ្នោត លោកបេននី ហ្គង់ និងលោកយែរ ឡាពីដចែកគ្នាកាន់តំណែងនាយករដ្ឋមន្រ្តីរយៈពេល ២ឆ្នាំកន្លះម្នាក់។ ចំណែកសត្រូវរួមរបស់សម្ព័ន្ធភាពនេះមានតែមួយ គឺនាយករដ្ឋមន្រ្តីផុតអាណត្តិលោកនេតាន់យ៉ាហ៊ូដែលបានកាន់តំណែងតាំងពី ១០ឆ្នាំ និងកំពុងជាប់ជំពាក់វាក់វិននឹងរឿងអាស្រូវពុករលួយ។
រឿងអាស្រូវមួយនេះកំពុងធ្វើឲ្យលោកនេតាន់យ៉ាហ៊ូទទួលរងការរិះគន់កាន់តែខ្លាំង និងជាចំហនៅផ្ទៃក្នុងគណបក្សរបស់លោក។ ទន្ទឹមគ្នានេះ លោកក៏អាចនឹងរងការចោទប្រកាន់ជាផ្លូវការពីរដ្ឋអាជ្ញា តែគេនៅមិនទាន់ដឹងថា តើសេចក្តីសម្រេចរបស់រដ្ឋអាជ្ញានឹងធ្លាក់មកនៅមុនការបោះឆ្នោត ឬក្រោយការបោះឆ្នោត។ អ្វីដែលគេដឹង លោកនេតាន់យ៉ាហ៊ូកំពុងព្យាយាមស្រោចស្រង់គណបក្ស Likoud និងជីវិតនយោបាយរបស់លោកតាមរយៈការងាកទៅសុំការគាំទ្រពីគណបក្សតូចតាចមានទាំងគណបក្សជ្រុលនិយមផង។ បើលោកនេតាន់យ៉ាហ៊ូជាប់ឆ្នោតជាថ្មីនៅក្នុងការបោះឆ្នោតខាងមុខ នោះលោកនឹងក្លាយជាឥស្សរជនដែលកាន់តំណែងនាយករដ្ឋមន្រ្តីយូរជាងគេនៅក្នុងប្រវត្តិប្រទេសអ៊ីសា្រអែល ពោលយូរជាងបិតាស្ថាបនិករដ្ឋអ៊ីស្រាអែលលោក David Ben Gourion ដែលកាន់តំណែងរយៈពេល ១៣ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ