ប្រទេសផលិតប្រេងអំពាវនាវឱ្យធ្វើវិនិយោគ ថាមពលគ្រប់ប្រភេទ
អារ៉ាប៊ីសាអូឌីត អេមីរ៉ាតអារ៉ាប់រួម ដែលជាប្រទេសនាំចេញប្រេងដ៏ធំជាងគេនៅលើពិភពលោក បានទទូចសុំឱ្យមានការវិនិយោគថាមពលគ្រប់ប្រភេទទាំងអស់ រាប់ទាំងថាមពលឥន្ធនៈ។ សេចក្តីអំពាវនាវនេះធ្វើឡើងតែប៉ុន្មានថ្ងៃមុនការបើកសន្និសីទអាកាសធាតុអន្តរជាតិCOP ២៧ និងចំថ្ងៃដែលអង្គការ OPEP បានចេញរបាយការណ៍បញ្ជាក់អំពីកំណើនសេចក្តីត្រូវការប្រេងនៅលើពិភពលោករហូតទល់នឹងឆ្នាំ២០៣៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
រងការរិះគន់តាំងពីយូរ ថាឧស្សាហកម្មបូមប្រេងនិងឧស្ម័នបំពុលបរិស្ថាន ហើយទើបទទួលការរាប់អានខ្លាំងនារយៈពេលប៉ុន្មានខែចុងក្រោយពីក្រុមបស្ចិមលោកដែលប្រឈមនឹងវិបត្តិថាមពលឡើងថ្លៃ រដ្ឋមន្ត្រីក្រសួងឧស្សាហកម្មអេមីរ៉ាតអារ៉ាប់រួម បានប្រកាស នៅក្នុងពិព័រណ៍ប្រេងអន្តរជាតិនៅអាប៊ូដាប៊ីថា ពិភពលោកត្រូវការរាល់គ្រប់ដំណោះស្រាយ ដើម្បី បំពេញសេចក្តីត្រូវការផ្នែកថាមពល។ ត្រូវវិនិយោគថាមពលព្រះអាទិត្យ ថាមពលវាយោ និងថាមពលនុយក្លេអ៊ែរ ទន្ទឹមគ្នាថាមពលប្រេង ឥន្ធនៈ ឧស្ម័នទើបបាន ព្រោះសន្តិសុខថាមពលគឺជាមូលដ្ឋានភាពជឿនលឿនសេដ្ឋកិច្ច សង្គម និងអាកាសធាតុ ហើយសេចក្តីត្រូវការផ្នែកថាមពលនៅលើពិភពលោក នឹងកើនឡើង៣០% ពីពេលនេះដល់ឆ្នាំ២០៥០។
បើតាមOpep ដោយសារប្រទេសកំពុងអភិវឌ្ឍ នៅអាហ្វ្រិក អាស៊ី និងឥណ្ឌា សេចក្តីត្រូវការផ្នែកប្រេង នឹងកើនឡើងរហូតពី ៩៦,៦លានធុងប៉ារីលក្នុងមួយថ្ងៃ នៅឆ្នាំ២០២១ ដល់១០៩,៥លានធុងក្នុងមួយថ្ងៃឆ្នាំ២០៣៥។ កំណើននឹងមានរហូតដល់១០៩,៨លានធុង ទើបចាំនឹងវិញ។
ចំណែករដ្ឋមន្ត្រីក្រសួងថាមពលអារ៉ាប៊ីសាអូឌីត រាជបុត្រ Abdelaziz ben Salmane បានឱ្យដឹងថា រាជាណាចក្រប្រេងក្នុងតំបន់ឈូងសមុទ្ទពែក្សទាំងពីរ មានគម្រោងអនាគតវិនិយោគថាមពលចម្រុះ ដើម្បីនឹងអាចមានប្រព័ន្ធថាមពល ទំនើប ជាក់លាក់ មាននិរន្តរភាពនិងតម្លៃសមរម្យ។
ក្រៅអំពីបង្ហាញឆន្ទៈវិនិយោគថាមពលគ្រប់ប្រភេទ ប្រទេសជិតខាងគ្នាទាំងពីរ ដែលជាសមាជិកអង្គការក្រុមប្រទេសអ្នកនាំចេញប្រេង បានប្តេជ្ញាសម្រេចកម្មវត្ថុកាត់បន្ថយការបញ្ចេញឧស្ម័នកាបូនិក កំរិតសូន្យ នៅឆ្នាំ២០៥០ តែក៏នឹងបង្កើនសមត្ថភាពផលិតប្រេងឆៅដែរ។ កាលពីសប្តាហ៍មុន ទីភ្នាក់ងារថាមពលអន្តរជាតិ បានគូសបញ្ជាក់ថាមានកំណើនវិនិយោគក្នុងវិស័យថាមពលកើតឡើងវិញ នៅទីផ្សារពិភពលោកដោយហេតុតែតម្លៃ ប្រេងនិងឧស្ម័នឡើងខ្ពស់ពេក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ