ស៊ីរី៖បារាំងត្រៀមបើកកិច្ចប្រជុំប្រទេសគាំទ្រក្រុមប្រឆាំងស៊ីរី ប្រទេសហូឡង់ស្នើស៊ើបអង្កេតកប៉ាល់ប្រេងរុស្ស៊ី
រដ្ឋាភិបាលបារាំងបានប្រកាសថ្ងៃពុធនេះ ថានៅដើមខែធ្នូខាងមុខនេះ បារាំងនឹងរៀបចំកិច្ចប្រជុំបណ្តាប្រទេសដែលគាំទ្រក្រុមប្រឆាំង និន្នាការកណ្តាលនិយមស៊ីរី ដើម្បីរក ដំណោះស្រាយ ចំពោះស្ថានភាពដែលកាន់តែដុនដាបនៅស៊ីរី។ ខណៈប្រជាជនស៊ីរីច្រើនគ្រួសារព្យាយាមគេចពីតំបន់អាឡិប តំណាងរាស្ត្រប្រទេសហូឡង់ បានស្នើអោយមានការអង្កេតទៅលើកប៉ាល់រុស្ស៊ី ដែលទំនងជាបានដឹកប្រេងកាតទៅអោយស៊ីរី ក្នុងពេលថ្មីៗ នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
ប្រជាជនស៊ីរីជាង១០០គ្រួសារបានព្យាយាមភៀសខ្លួនចេញពីតំបន់ដែលរងការឡោមព័ទ្ធនៅអាឡិបក្នុងពេលកងទ័ពស៊ីរីកំពុងវាយលុកទៅមុខ ប្រយុទ្ធជាមួយក្រុមឧទ្ទាម ដណ្តើមក្រុងអាឡិប។ កាលពីថ្ងៃអង្គារ កងទ័ពស៊ីរីបានទំលាក់ខិតបណ្ណអំពាវនាវអោយក្រុមបះបោរ និងជនស៊ីវិលចាកចេញពីក្រុងអាឡិប។
កងទ័ពស៊ីរីបានចោទក្រុមឧទ្ទាមថា ព្យាយាមទប់ស្កាត់មិនអោយជនស៊ីវិល២សែន៥ម៉ឺននាក់ ចេញពីអាឡិប ដើម្បីទុកពួកគេធ្វើជាខែលការពារ។ ១សប្តាហ៍មកនេះ នៅភាគខាងកើតអាឡិប ជនស៊ីវិលជិត១៥០នាក់បានស្លាប់ ក្រោមការទំលាក់គ្រាប់បែក និងគ្រាប់កាំភ្លើងរបស់កងទ័ពស៊ីរី។ អង្គការSave The Children បានបរិហារគ្រប់ភាគីប្រយុទ្ធទាំងអស់ ចំពោះការស្លាប់មនុស្សសន្ធឹកសន្ធាប់នៅស៊ីរី។ រហូតពេលនេះ សហគមន៍អន្តរជាតិគ្មានប្រសិទ្ធភាពដោះស្រាយសង្គ្រាមនិងសោកនាដកម្មមនុស្សធម៌ស៊ីរីទាល់តែសោះ។
នៅដើមខែធ្នូឆាប់ៗនេះ បារាំងបើកកិច្ចប្រជុំបណ្តាប្រទេសអារ៉ាប់ និងប្រទេសលោកខាងលិចដែលគាំទ្រក្រុមប្រឆាំងស៊ីរី និន្នាការកណ្តាលនិយម។ បារាំងបន្តគាំទ្រអោយអង្គការសហប្រជាជាតិចេញសេចក្តីសម្រេចដាក់ទណ្ឌកម្មលើរដ្ឋាភិបាលស៊ីរីចំពោះការប្រើប្រាស់អាវុធគីមី។
ដោយឡែក កាលពីថ្ងៃអង្គារ សារព័ត៌មានរ៉យតឺ Reuters បានចុះផ្សាយថា កប៉ាល់រុស្ស៊ីជាច្រើនគ្រឿងបានឆ្លងកាត់តាមកំពង់ផែChypres និងក្រិក ដើម្បីដឹកប្រេងកេរ៉ូសែន ទៅអោយស៊ីរី។ ទង្វើនេះជាការបំពានលើទណ្ឌកម្មអឺរ៉ុប ដែលបានហាមឃាត់ការដឹកប្រេងប្រភេទនេះ កាត់តាមអឺរ៉ុប ទៅអោយស៊ីរី។ ក្រសួងការបរទេសChypres បានលើកឡើងថា មិនបានអនុញ្ញាតអោយកប៉ាល់រុស្ស៊ីណាមួយចូលក្នុងកំពង់ផែខ្លួនទេ។ រីឯក្រិកកវិញ បានសួរបញ្ហានេះ ទៅខាងផ្នែកជើងទឹកជាតិខ្លួន។
ថ្ងៃពុធម្សិលមិញ ស្ត្រីតំណាងរាស្ត្រប្រទេសហូឡង់មួយរូបបានចោទសួរបញ្ហានេះទៅតំណាងការទូតអឺរ៉ុប និងសុំអោយបើកការស៊ើបអង្កេតទៅលើកប៉ាល់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ