អស់ពីប្រហារជីវិតមនុស្ស ក្រុមជីហាតវាយបំផ្លាញវត្ថុបុរាណដែលមានអាយុ រាប់ពាន់ឆ្នាំ
នៅប្រទេសអ៊ីរ៉ាក់ ក្រុមជីហាតនៃអង្គការរដ្ឋអ៊ីស្លាមបានបង្ហោះរូបភាពគួរឲ្យរន្ធត់មួយទៀត កាលពីថ្ងៃព្រហស្បតិ៍ ទី ២៦ កុម្ភៈ។ លើកនេះមិនមែនចំណាប់ខ្មាំងបរទេសទេ ដែលត្រូវប្រហារជីវិត ប៉ុន្តែ គឺបដិមាករ និងវត្ថុបុរាណជាច្រើន ដែលកសាងឡើង មុនគ្រឹស្តសករាជ ដែលត្រូវពួកជីហាតវាយបំផ្លាញកម្ទេច ជាផេះផង់។ នៅថ្ងៃផ្សព្វផ្សាយវីដេអូរបស់ក្រុមជីហាត នាយិការរបស់អង្គការយូនេស្កូ បានស្នើសុំឲ្យក្រុមប្រឹក្សាសន្តិសុខនៃអង្គការសហប្រជាជាតិកោះប្រជុំជាបន្ទាន់ ដើម្បី ដោះស្រាយវិបត្តិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៩
សកម្មភាពសាហាវឃោឃៅរបស់ក្រុមជីហាតគ្មានដែនកំណត់។ បន្ទាប់ពីបង្ហោះវីដេអូ ដែលបង្ហាញពីការប្រហារជីវិតយ៉ាងព្រៃផ្សៃ ទៅលើចំណាប់ខ្មាំង និងអ្នកទោសសង្រ្គាមរបស់ខ្លួន ក្រុមជីហាត បានបង្ហាញផ្សព្វផ្សាយ ជាលើកទីមួយរ ការបំផ្លាញវត្ថុបុរាណរបស់ទីក្រុងម៉ូស៊ូល។ លោកស្រី Irina Bokova នាយិការអង្គការយូនេស្កូបាននិយាយថា ការបំផ្លាញវត្ថុបុរាណ នៅសារមន្ទី ម៉ូស៊ូល មិនត្រឹមតែជាសោកនាដកម្មដ៏ធំធេងមួយសម្រាប់វប្បធម៌ ប៉ុន្តែ វាស្តែងផងដែរពីចំណោទសន្តិសុខ ដែលនៅក្នុងនោះមានផងដែរ និកាយនិយម អំពើហិង្សាជ្រុលនិយម និងជម្លោះ ដែលកំពុងកើតមាននៅក្នុងប្រទេសអ៊ីរ៉ាក់។ នាយិការរបស់យូនេស្កូ បានស្នើសុំឲ្យក្រុមប្រឹក្សាសន្តិសុខនៃអង្គការសហប្រជាជាតិបើកកិច្ចប្រជុំជាបន្ទាន់ ព្រោះថា សកម្មភាពបំផ្លាញវត្ថុបុរាណពីសំណាក់ពួកជីហាតកំពុងដើរផ្ទុយនឹងសេចក្តីសម្រេច លេខ ២១៩៩ ដែលក្រុមប្រឹក្សាសន្តិសុខ បានបោះឆ្នោតអនុម័ត នៅដើមខែកុម្ភៈ។ ក្រុមប្រឹក្សាសន្តិសុខនៃអង្គការសហប្រជាជាតិបានបោះឆ្នោតចេញសេចក្តីសម្រេចមួយ ដើម្បី ទប់ស្កាត់ប្រាក់ចំណូលរបស់ពួកជីហាត ដែលបានពីការលក់វត្ថុបុរាណ ដែលលួចពីអ៊ីរ៉ាក់ និងស៊ីរី។
តាមនាយិការ របស់អង្គការយូនេស្កូ បដិមាករមួយចំនួនដែលពួកជីហាតវាយបំផ្លាញ មានប្រភពមកពីស្ថានីយ៍បុរាណ Hatraរបស់អ៊ីរ៉ាក់ ដែលត្រូវអង្គការយូនេស្កូបានចាត់ចូលក្នុងបញ្ជីបេតិកភណ្ឌពិភពលោក។ ដោយមូលហេតុនេះហើយ ទើប នៅថ្ងៃព្រហស្បតិ៍ យូនេស្កូ បានស្នើសុំទៅប្រធានក្រុមប្រឹក្សាសន្តិសុខរបស់អង្គការសហប្រជាជាតិបើកការប្រជុំជាបន្ទាន់ ដើម្បីធ្វើយ៉ាងម៉េចអាចការពារវត្ថុបុរាណអ៊ីរ៉ាក់ ពីការបំផ្លាញរបស់ក្រុមជីហាតតទៅទៀត។ ត្រូវដឹងថា ក្រុមជីហាតចូលកាន់កាប់ទីក្រុងម៉ូស៊ូលតាំងពីខែមិថុនា ឆ្នាំមុន។ អ្នកជំនាញវាយតម្លៃថា មានស្ថានីយ៍បុរាណរបស់អ៊ីរ៉ាក់ ប្រមាណ ១៨០០កន្លែង ក្នុងចំណោម ១ម៉ឺន ២ពាន់ ដែលចុះក្នុងបញ្ជីបេតិកភណ្ឌពិភពលោក ស្ថិតនៅក្នុងតំបន់ដែលកំពុងកាន់កាប់ ដោយក្រុមជីហាត នៃអង្គការរដ្ឋអ៊ីស្លាម។
ទាំងអ្នកបុរាណវិទ្យា អ៊ីរ៉ាក់ និងអន្តរជាតិ ចាត់ទុកសកម្មភាពរបស់ពួកជីហាត ថា ជាអំពើព្រៃផ្សៃ ព្រោះក្រុមនេះបានបំផ្លាញខ្ទេចវត្ថុមានតម្លៃ ដែលឆ្លុះបញ្ចាំងពីអរិយធម៌របស់ក្រុងម៉ូស៊ូល។ តាមក្រុមអ្នកជំនាញពួកជីហាតកំពុងធ្វើសកម្មភាពដូចពួកតាលីបង់ ដែលបាន បាញ់ និងបំផ្ទុះរូបបដិមារព្រះពុទ្ធ ក្នុងប្រទេសអាហ្វហ្កានីស្ថាន នៅឆ្នាំ ២០០១។ ហើយនៅក្នុងចំណោម វត្ថុបុរាណនានាដែលពួកជីហាតវាយ ខួង បំផ្លាញ នៅសារមន្ទីរ ក្នុងក្រុងម៉ូស៊ូល មានតាំងពី បដិមាករ រូបចម្លាក់ មានតម្លៃមហាសាល ដែលកសាងឡើង តាំងពីសតវត្សរ៍ទី ៧ មុនគ្រឹស្តសករាជម្ល៉េះ។ វត្ថុបុរាណភាគច្រើន កសាងឡើងនៅសម័យAssyriens គឺមុនកំណើតសាសនាអ៊ីស្លាមទៅទៀត។ នេះមិនមែនជាលើកទីមួយទេ ដែលពួកជីហាតបំផ្លាញវត្ថុដែលមានអាយុ ចំណាស់ រាប់ពាន់ឆ្នាំនោះ។ តាមទូរទស្សន៍អង់គ្លេស BBC ក្រុមជីហាតបានដុតសៀវភៅបុរាណអ៊ីរ៉ាក់ ប្រមាណ ៨ពាន់ក្បាលរបស់បណ្ណាល័យ នៅទីក្រុងម៉ូស៊ូលនេះដែរ។
ព្រះជាអ្នកបញ្ជាឲ្យយើងវាយបំផ្លាញរូបបដិមាករ
នៅក្នុងវីដេអូ ដែលមានរយៈពេល៥នាទី ជនប្រដាប់អាវុធរបស់ជីហាត បាននិយាយការពារសកម្មភាពវាយបំផ្លាញរបស់ខ្លួន ថា ធ្វើឡើង ដើម្បីបុព្វហេតុសាសនា។ គឺព្រះដែលបញ្ជាឲ្យពួកគេបំផ្លាញវត្ថុបុរាណ។ ជីហាតម្នាក់និយាយនៅមុខកាម៉េរ៉ាថា “អ្នកកាន់សាសនាអ៊ីស្លាមទាំងឡាយ រូបចម្លាក់ដែលនៅពីក្រោយខ្ញុំនេះ ធ្លាប់ត្រូវបានមនុស្សជំនាន់ដើមគោរព។ ពួកគេគោរពរូបបដិមាករទាំងនេះ ប៉ុន្តែ មិនគោរពព្រះអាឡាទេ”។ ក្នុងវីដេអូមួយទៀត គេឃើញផងដែរ ក្រុមជីហាត បានបំផ្លាញបដិមាករ រូប គោ ជើង៥ ជើង នៅក្នុងស្ថានីយ៍បុរាណ មួយ ដែលស្ថិតនៅមាត់ច្រក ចូលទីក្រុងម៉ូស៊ូល។ រូបគោជើង៥នេះ ជានិមិត្តរូបសំខាន់ និងត្រូវគេយកទៅបោះពុម្ពលើក្រដាសលុយរបស់អ៊ីរ៉ាក់។
តាមប្រធានសារមន្ទីរជាតិអ៊ីរ៉ាក់ ដែលបានផ្តល់បទសម្ភាសន៍ដល់ទូរទស្សន៍ អាមេរិកCNN ការស្អប់ ប្រឆាំងនឹងវត្ថុបុរាណ របស់ពួកជីហាត គ្មានលក្ខណៈមនោគមវិជ្ជាទាល់តែសោះ។ កន្លងមក ក្រៅតែប្រេង ពួកជីហាតនេះធ្លាប់រកលុយបានច្រើន ពីការលក់វត្ថុបុរាណ របស់តំបន់ដែលខ្លួនវាយចូលកាន់កាប់បាន ទៅទីផ្សារងងឹត។ តាមប្រជាជនដែលធ្លាប់រស់នៅក្នុងតំបន់កាន់កាប់ដោយពួកជីហាត នៅស៊ីរី និងនៅអ៊ីរ៉ាក់ ក្រុមជីហាតថែមទាំងបានបើកដៃឲ្យប្រជាជនជីកកកាយ រកវត្ថុបុរាណ យកទៅលក់ក្នុងទីផ្សារងងឹត និងចែកភាគរយគ្នា នៅពេលលក់បាន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ